زلزلوں کا خوف پہلے بھی کچھ کم نہ تھا کہ ایک آسٹریلوی ماہرارضیات نے یہ کہہ کر دنیا کو دہلا دیا

سڈنی (27اگست-2016) آئے روز رونما ہونے والے زلزلوں کا خوف پہلے بھی کچھ کم نہ تھا کہ ایک آسٹریلوی ماہرارضیات نے یہ کہہ کر دنیا کو دہلا دیا ہے کہ اب تک ہم نے جو زلزلے دیکھے وہ مستقبل قریب میں آنیوالے زلزلے کے سامنے کچھ بھی نہیں کیونکہ آنیوالے دنوں میں دنیا کے ہر خطے میں شدید طاقت کے حامل زلزلے بکثرت آنے والے ہیں۔ اخبار ڈیلی سٹار کی رپورٹ کے مطابق جیو ٹیکنیکل اینڈ ارتھ کوئیک انجینئرنگ کے ماہر ڈاکٹر بہزاد فتحی کا کہنا ہے کہ مشرق وسطیٰ، بھارت ، چین ، جاپان اور امریکہ سمیت دنیا بھر میں 6 شدت سے زائد کے زلزلے آنیوالے ہیں۔ ان کا کہنا ہے کہ دنیا کے مختلف خطوں میں واقع فالٹ لائنوں نے ایک عرصے سے اپنی توانائی خارج نہیں کی ہے اور اب سوال یہ نہیں ہے کہ زلزلے آئیں گے یا نہیں بلکہ صرف یہ کہ کب آئیں گے۔ ا ن کاکہنا ہے کہ ان بڑے زلزلوں میں سے 5 سے 10 زلزلے کسی بھی وقت رونما ہو سکتے ہیں۔ ڈاکٹر فتحی کی یہ وارننگ ایک ایسے وقت پر آئی ہے کہ جب دو دن قبل اٹلی میں آنیوالے 6.2 شدت کے زلزلے نے وسیع و عریض علاقے کو برباد کر دیا ہے اور سینکڑوں افراد لقمہ اجل بن گئے ہیں۔ ان کا کہنا ہے کہ سب سے خوفناک بات یہ ہے کہ اصل تباہی ایک بڑے زلزلے کے بعد آسکتی ہے۔ انہوں نے وضاحت کرتے ہوئے بتایا کہ یوریشیا اور افریقہ کی ارضی پلیٹیں جس جگہ ملتی ہیں وہاں بہت بڑی فالٹ لائن بنتی ہے۔ اٹلی بھی اس فالٹ لائن کے اوپر واقع ہے۔ ان کا کہنا تھا کہ میگا زلزلے کی صورت میں یہ فالٹ لائن پھٹ جائے گی اور زمین کے نیچے موجود لاوا زمین کے اوپر آجائے گا، جس کی وجہ سے اتنی بڑی تباہی ہو گی کہ جسے الفاظ میں بیان کرنا ممکن نہیں ۔